Unha viaxe salvaxe arredor do mundo

Durante as últimas semanas, a nosa aula de tres anos converteuse nunha auténtica aventura arredor do mundo. Da man do noso amigo Frank, viaxamos desde España ata Sudáfrica, Panamá e Australia para descubrir animais sorprendentes, coñecer os seus fogares e aprender a coidar e respectar a natureza.

Cada postal, cada vídeo e cada mensaxe de Frank espertaban novas preguntas, sorrisos e moitísima curiosidade. Así coñecemos os animais da sabana africana, as aves máis coloridas da selva e os pequenos habitantes do fondo do mar. Entre todos, os nosos protagonistas favoritos foron a xirafa, o guacamayo e o peixe pallaso, que nos acompañaron en xogos, contos e actividades cheas de imaxinación.

Na aula pintamos, estampamos, clasificamos animais segundo o seu hábitat e descubrimos se vivían na terra, no aire ou no mar. Creamos pequenas obras de arte, observamos cores e formas, xogamos con diferentes materiais e gozamos de historias que nos fixeron viaxar sen saír da clase.

Tamén aprendemos que cada animal necesita coidados, protección e un lugar onde vivir feliz. Pouco a pouco, os nenos e nenas foron comprendendo que existen animais moi distintos aos que vemos preto da casa, pero todos igual de importantes e especiais.

O máis bonito desta experiencia foi ver como a ilusión medraba cada día: as ganas de descubrir unha nova postal, recoñecer animais, contar o aprendido e compartilo cos compañeiros. O noso recuncho de Infantil encheuse de selvas, océanos, sabanas e moitísimas aventuras.

E aínda que a viaxe de Frank xa está chegando ao final… estamos seguros de que os nosos pequenos exploradores xa están preparados para a próxima aventura.