Encontro de xefaturas de estudo de infantil, primaria e secundaria en Valladolid

• O lugar elixido, como en anteriores ocasións, foi a Casa Parmenia, residencia e lugar de traballo do Equipo de Animación.

• No encontro participaron 26 docentes, en cargo actual de xefe de estudos ou coordinador de etapa, procedentes das diferentes obras educativas da zona noroeste. Asistiron tres profesores do noso centro: Alicia López, Andrea Rodríguez e Juan González.

Son moitos e diversos os retos que se cruzan no camiño da nosa escola; nesta ocasión, o Novo Contexto de Aprendizaxe, a LOMLOE e a intelixencia emocional foron os grandes temas expostos e traballados polos equipos directivos dos centros La Salle. Os grandes desafíos necesitan respostas en rede, e unha vez máis puxemos a funcionar a reflexión compartida e o labor cooperativo.

A primeira xornada, en clave formativa, tivo ao mando a Pablo Villanueva, coach sénior e consultor de persoas, equipos e organizacións, que presentou aos asistentes a importancia da intelixencia emocional na xestión de equipos. Un programa formativo con máis de 10 anos de percorrido que centra a súa atención no desenvolvemento da confianza persoal, a capacidade de comunicación cos demais, a coherencia do discurso cos actos e a capacidade de adaptación fronte aos problemas de cada tempo.

E da formación, pasamos á acción O segundo día de encontro, organizado por equipos de etapa, puxo na mesa de traballo as incidencias e evolución do Novo Contexto de Aprendizaxe entre as diferentes comunidades educativas e a adaptación do modelo pedagóxico á Lei Orgánica de Modificación de LOE. Laura Mosquera -profesora de La Salle Santiago-, Javier del Val -condutor do Novo Contexto de Aprendizaxe para Educación Secundaria Obrigatoria-, Noelia Redondo -delegada de formación- e Iñaki Asegurado -delegado de educación- foron os coordinadores e moderadores das diferentes mesas de traballo. Un traballo común que, sen dúbida, vai dando os seus primeiros froitos en cada colexio e en cada alumno.