Peza a peza, construímos un mundo mellor!

Que ganas tiñamos de volver vernos! O luns 28 de setembro, as familias de 4 e 5 anos (5º e 6º de Educación Infantil) encheron o salón de actos no noso primeiro encontro do curso. Houbo caras coñecidas, saúdos, sorrisos e esa sensación tan bonita de volver á casa despois do verán.

A xefatura de estudos de Educación Infantil e a Dirección do centro déronnos a benvida. Despois presentaron o lema que nos acompañará este curso, adaptado para os máis cativos: “Peza a peza, construímos un mundo mellor”.

E por que pezas? Porque así se constrúen as cousas importantes: unha a unha e entre todos. Cada peza é un pequeno xesto, como compartir, axudar, escoitar ou dar a man. Cando xuntamos as de todos (nenos, nenas, familias e educadores), levantamos algo moito máis grande do que ninguén podería facer só. Esa é a idea que imos vivir nas aulas ao longo do curso.

Tamén nos acompañou un representante de PROYDE. Lembrounos que a solidariedade forma parte do noso ADN lasaliano e faloúnos do Fogar Akwaba de La Salle. Akwaba significa benvida, acollida, protección e oportunidades: catro palabras que encaixan de marabilla co lema.

Ademais, o presidente da Asociación de Nais e Pais (ANPA) animou as familias a participaren e a sumárense á vida do cole. Elas tamén son unha peza imprescindible desta construción.

As construcións de cores que naceron desta proposta xa lucen no cole. Lémbrannos que, cando cada quen achega a súa peza, o resultado é moito máis bonito.

Grazas a todas as familias por vir! Este curso, peza a peza, seguimos construíndo xuntos.