Parlamento Xove 3.º de Secundaria

O equipo de 3.º de ESO alcanca a fase final do Torneo de Debate Parlamento Xove na súa edición de 2025, tras clasificarse en segunda posición ao terminar a fase clasificatoria, na que participaron 28 equipos, que se celebrou os días 14 e 15 de marzo no Carballiño (Ourense).Parlamento Xove é un programa da Xunta de Galicia baseado nunha competición na que os diversos equipos inscritos investigan e debaten sobre un tema formulado pola organización.

Na edición deste ano, o tema de debate da fase clasificatoria foi: ”Compénsalle a Europa apostar pola reindustrialización?”.

O obxectivo deste programa é potenciar as habilidades individuais e grupales (destacando o desenvolvemento da capacidade de selección de información, expresión oral, orixinalidade e a argumentación razoada) á vez que fomenta a lectura, a escritura, o emprego de novas tecnoloxías con fins informativos e culturais así como o respecto polas ideas dos demais.

Os estudantes Jacobo Troitiño (argumentador inicial), Sofía Blanco e Noela Cores (refutadoras) e Paloma Coucheiro (conclusora); coordinados polos profesores Monica de Soto e Xan Guillén enfrontáronse ao IES Muralla Romana, IES Luís Seoane e ao IES Rafael Puga Ramón gañando os tres debates. Ademais a alumna Noela Cores levou o premio a mellor oradora do torneo.

Aínda non hai tema, nin data, para a fase final polo que toca descansar, recuperar forzas e frescura co obxectivo de afrontar a fase final nas mellores condicións.