O noso internivel musical

“A música é a arte máis directa, entra polo oído e vai ao corazón”

Magdalena Martínez, flautista española

No Entorno Internivel de Música proponse ese primeiro achegamento á arte e destreza musical do alumnado. Nestas primeiras sesións estamos a traballar moitos aspectos corporais da música: cancións, ritmo, escoitas activas… e mesmo comezamos a expresar a música que escoitamos tanto co corpo como con material plástico.

Durante este curso coñeceremos instrumentos de percusión, farémolos nosos propios instrumentos e achegarémonos de xeito tímido pero firme na expresión musical tanto instrumentalmente como a nivel vocal. Todo isto sen esquecernos da nosa propia tradición cultural, posto que temos unha comunidade que nos ofrece multitude de cantigas e instrumentos de percusión miúda o que nos enriquece culturalmente.

Así imos potenciar un mellor coñecemento das posibilidades do noso corpo, o que posibilitará o incremento da conciencia do esquema corporal. Pero tamén o achegamento á cultura e ao coñecemento da nosa sociedade e das nosas tradicións así como a potenciación das nosa capacidade creativa e de discriminación auditiva.

Sen dúbida, as tardes de música convértense nun momento de aprendizaxe e diversión para os nosos pequenos!