Na lembranza dun bo profesional e excelente amigo

Na tarde do xoves, día 8, festa da Inmaculada, o noso amigo Manuel Miramontes Fandiño (Mestre Bartolo), entregaba a súa alma ao Creador, despois dunha longo vida, xenerosamente posta ao servizo da cultura galega, na especialidade de gaita, como profesor e construtor.

Nunha viaxe en tren de Santiago á Coruña, atopouse co director do colexio La Salle, daquela Irmán José María Valladolid. Logo de darse a coñecer, o director quedou tan cativado que lle propuxo comezar a impartir gaita no centro, como actividade extraescolar, e así foi.

Desde 1970 ata 2005, o Mestre Bartolo e máis tarde a súa filla Rita e a súa nora Montse estiveron impartindo gaita, baile e pandeireta no colexio. O grupo reducido que comezou foise incrementado de modo que tivo un gran apoxeo entre os anos 1978 a 1984 con dous grupos de gaiteiros: avanzados e iniciados que chegou a alcanzar o número de 50 persoas.

Entre estes anos a Escola de Gaita La Salle foi seleccionada para representar a Galicia no Festival Intercéltico de Lorient (Francia) por catro veces, e dúas veces máis para participar no Festival de Nantes (Francia). Actividades tamén dignas de mención foron as visita a centros de La Salle en Palencia, Valladolid, Bujedo e do outro lado do Miño, Barcelos e Braga. Facilitou este auxe o feito de o colexio ter internado. Cando desapareceu este o número de membros da Escola de Gaita e Danza foi reducíndose ata a súa desaparición no ano 2005.

Con todo a familia Miramontes seguiu vinculada ao colexio para actividades puntuais onde as gaitas e o baile enchían de ledicia e colorido actos como: as Festas Colexiais, a ofrenda no Panteón de Galegos Ilustres, día de Exaltación do Traxe Galego…

Con estas liñas queremos amosar ao Mestre Bartolo e á súa familia a nosa grata lembranza e sincero agradecemento polo labor desenvolvido no Colexio durante 35 anos.

Adeus irmán, que se abran sos ceos.

Adeus, irmán, que sexas feliz

Na despedida pedímoslle ao Pai:

Paz e Alegría sen fin para ti.

Ir. Xosé Francisco Martínez Reboiras