Esa tal… Mona Lisa

Que segredos esconde esa dama florentina representada en un pequeno cadro?

“Que pasa no museo” é o título do noso Terceiro Proxecto NCA. Unha nova temática con perspectiva artística onde os nosos pequenos e pequenas exploran, investigan e descobren de forma individual, grupal ou con axuda das familias, as características máis representativas da época renacentista. Tomando como referencia o gran Leonardo da Vinci e a súa obra pictórica máis famosa, A Mona Lisa, penetramos no mundo da arte.

O eco artístico xerado pola tan renomeada obra, convidou a moitos autores á creación de múltiples e variadas versións da Gioconda, destacando polo seu especial estilo e cor a Fernando Botero e Andy Warhol. É na riqueza do contraste entre estes tres autores (Da Vinci, Botero e Warhol), onde os nosos nenos e nenas exploran a variedade de interpretacións a través da cor, forma, estilo e perspectiva.

O retrato pasa a ser un elemento fundamental da expresión artística e o autorretrato como un fantástico motivo e base para a autoobservación, autocoñecemento e conciencia corporal.

O traballo do fondo e a superficie, a perspectiva desde diferentes ángulos, a procura dos detalles, a definición dun estilo, a curiosidade polo descubrimento dunha historia escondida nun cadro tan pequeno…, ábrenos un novo camiño na expresión das nosas propias creacións.

SONIA FRANCO TORRES

Mestra de Educación Infantil