Celebramos a semana da lectura por todo o alto!

Estes días celebrouse a semana da lectura na etapa de educación primaria, onde o alumnado
mais o profesorado gozaron de numerosas actividades somerxidos nun mundo pirata.

O pasado luns, as nenas e nenos de primaria, chegaron ao colexio e atopárono totalmente distinto: piratas, illas, canóns, barcos, loros… Unha aventura pirata daba comezo, e o alumnado estaba totalmente abraiado! Ademais, como parte da decoración, había numerosos carteis con profesores e profesoras piratas polos que se ofrecía unha boa recompensa. Que emocionante!

Numerosas e variadas actividades fóronse levando a cabo ao longo destes días. Cada mañá, as nenas e nenos escoitaron unha adiviña relacionada con famosos personaxes de contos. Ao rematar a semana, sorteouse entre o alumnado de cada clase un libro pirata que nos fixo chegar a Anpa, e polo que estamos moi agradecidas.

Os nenos e nenas de 1º, 2º e 3º gozaron de divertidas xincanas que tiveron que superar nas súas clases de educación física. O alumnado de 4º, 5º e 6º tivo que resolver xogos de scape room literarios do máis intensos pero que, con traballo en equipo, conseguiron facer con éxito.

A lectura e os contos estiveron presentes a través de actividades especiais. A nosa auxiliar de conversación, Maeve, contou fascinantes historias piratas ás nenas e nenos dos distintos niveis nas clases de lingua inglesa. Ademais, tivemos a actividade de “apadriña a un lector”, na que o alumnado de 6º compartiu tempo de lectura co de primeiro; tanto os máis pequenos coma os maiores sentíronse moi emocionados e emocionadas coa experiencia.

Mais non todo é lectura! As nenas e nenos tamén estiveron realizando actividades de escritura, nas que redactaron marabillosas historias piratas. Ademais, nas clases de plástica, estiveron facendo binóculos, barcos pirata, loros, bandeiras, mapas do tesouro e cofres.

Como nos gusta tanto escoitar historias, tivemos a sorte de ter entre nós a Charo Pita, unha coñecida contacontos e escritora galega que nos fixo gozar moito cos seus contos!

Por último, todos os nenos e nenas participaron nunha divertida actividade: tiveron que escribir unha mensaxe na que debían expresar por que ler é importante, e puideron engadir algunha recomendación de libros que lles gustaban. Cada unha destas mensaxes meteuse nunha botella de plástico, para despois colocar todas xuntas colgando nas paredes do patio cuberto. O máis emocionante será que, dentro dunhas semanas, cada neno e nena recibirá unha botella coa mensaxe escrita por algún dos moitos compañeiros e compañeiras da etapa de primaria.

Estamos moi agradecidas e agradecidos ao marabilloso equipo de profesorado que se implicou e organizou esta semana chea de actividades e dinámicas feitas con tantas ganas e agarimo. Estamos seguras de que as nenas e nenos non esquecerán estes días, e que a súa motivación para ler e escribir continúa en aumento.

Esperamos con moita emoción a semana da lectura do próximo curso escolar, namentres agardaremos lendo apaixonantes historias!